Veiðistaðavefurinn
Hólmavatn er á Hólmavatnsheiði, norður af bænum Sólheimum í Laxárdal í um 180 km fjarlægð frá Reykjavík, og um 30 km frá Búðardal. Það er um 1 km2 að stærð og í um 190 m hæð yfir sjávarmáli.
Ekið er um Bröttubrekku í áttina að Búðardal, ef komið er að sunnan, annars farið hefðbundnar leiðir frá Norðurlandi eða Vestfjörðum. Rétt áður en komið er að Laxá í Dölum er beygt upp Laxárdal á þjóðvegi 59 og ekið áleiðis 24,8 km að bænum Sólheimum þar sem veiðimenn skrá sig. Þaðan er um 5 km vegur upp á heiði, en hann er ekki greiðfær fólksbílum, þó að hægt sé að aka þar á vel útbúnum og háum fjórhjóladrifsbílum. Jepplingar og jeppar henta þar að sjálfsgöðu best. Einnig er hægt að aka um Holtavörðuheiði, en sú leið er aðeins 10 km lengri frá Reykjavík.
Einungis má veiða landi Sólheima, eða frá útfalli austur fyrir vatnið og norður að þeim punkti þar sem Reiðgötuvatn liggur að vatninu – sjá bláa línu á korti.
Nokkuð góð veiði er í vatninu, or er bæði urriði og bleikja í vatninu. Bleikjan virðist hinsvegar á undanhaldi. Algeng stærð fiska er 1-2 pund.
Leyfilegt er að veiða í Hólmavatni frá morgni til kvölds, en athugið samt að skráning inn á svæðið þaref að vera á milli klukkan 7:00 og 22:00.
Veiðitímabilið hefst ekki fyrr en um miðjan júní, eða þegar vegurinn að vatninu er orðinn fær, og því lýkur 30. september.
Heimlt er að veiða með flugu, maðki, og spón. Öll netalögn er stranglega bönnuð.
Nokkuð góð og jöfn veiði er allt sumarið.
