Veiðistaðavefurinn
Selá í Álftafirði er tveggja stanga, 15 km löng dragá á Austurlandi. Hún er staðsett í um 500 km fjarlægð frá Reykjavík og um 63 km frá Höfn í Hornafirði. Áin rennur um Starmýrardal og til sjávar í Álftafirði, rétt austan við Þvottárskriður.
Umhverfi Selár er einstaklega fagurt og fjölbreytt þar sem hún hlykkjast um gljúfur og grösuga dali. Áin er fiskgeng um 9 km vegalengd og geymir um 20 merkta veiðistaði. Veitt er á tvær stangir út tímabilið, sem nær frá 1. júlí til 30. september, og er eingöngu leyfð fluguveiði.
Lax- og silungsveiði í Selá
Í ánni er öflugur náttúrulegur laxastofn og eru hrygningar- og uppeldisaðstæður taldar mjög góðar. Við ósa árinnar má einnig vænta góðra gangna af sjóbleikju auk þess sem sjóbirtingur veiðist þar reglulega.
Uppbygging og veiðileyfi
Ekki eru seld almenn veiðileyfi í ána að svo stöddu. Núverandi leigutakar vinna markvisst að uppbyggingu árinnar með það að markmiði að koma á fót sjálfbærri ræktun og efla stofninn til framtíðar.
Aðstaða fyrir veiðimenn
Veiðimenn hafa aðgang að gistingu í eldra íbúðarhúsi sem fylgir ánni. Þetta er tvílyft hús klætt bárujárni.
Leiðarlýsing og staðsetning
Ekið er austur fyrir Höfn í Hornafirði á þjóðvegi 1 þar til komið er í Álftafjörð. Beygt er til vinstri að Múla 3, um 10 km eftir að ekið hefur verið yfir brúna á Selá.
