Svæði sem vert er að skoða
Heim / Laxveiði / Laxveiði á norðurlandi / Mýrarkvísl í Reykjahverfi
Iceland Outfitters

Mýrarkvísl í Reykjahverfi

Mýrarkvísl - Veiðistaðavefurinn

Mýrarkvísl er í mikilli náttúrufegurð í Reykjahverfi við Húsavík í um 465 km fjarlægð frá Reykjavík, en í einungis um 10 km fjarlægð frá Húsavík.
Þetta er dragá, með drjúgum lindáreinkennum, og er ekki mjög stór. Hún á upptök sín í Langavatni og er um 25 km vegalengd frá vatni og niður að ósi við Laxá í Aðaldal, en áin er ein af mörgum hliðarám Laxár í Aðaldal. Áin öll er hinsvegar rúmlega 31 km löng. Mýrarkvísl er fiskgeng alveg upp að vatni, og eru merktir veiðistaðir um 50 talsins.

Á leiðinni úr Langavatni og niður að ósi við Laxá rennur áin um ægifagurt og fjölbreytt umhverfi, allt frá rólegheita breiðum og upp í mikil gljúfur með ævintýralegu aðgengi að veiðistöðum með heilmiklu klöngri. Gljúfrin hafa ætíð verið ein af vinsælustu svæðum árinnar en bera skal í huga að þetta er heilmikið klöngur og þarf að nota kaðla til að komast á einhverja staðina.

Lax og urriði veiðast í Mýrarkvísl og hefur meðalveiði í ánni verið um 143 laxar frá árinu 2000, og hefur Mýrarkvísl verið þekkt fyrir góða meðalþyngd laxa. Og þó svo Mýrarkvísl sé aðallega laxveiðiá skal hafa í huga að nokkuð mikið er af  sterkum urriðum sem einnig er gaman er að veiða. Mýrarkvísl hentar öllum hópum, bæði þá sem lengra eru komnir jafnt og byrjendum.

Veitt er á þremur stöngum í Mýrarkvísl, og er ánni skipt upp í 3 svæði með eina stöng á svæði.
Eingöngu er veitt á flugu og er öllum fiski sleppt aftur. Stangirnar 3 eru ætíð seldar saman.
Athuga ber að veiðileyfi í Langavatni fylgir með seldum veiðileyfum, en þar má auk flugu, veiða með maðk og spón.

Nokkuð gott aðgengi er að flestum veiðistöðum og hægt er að keyra á fólksbílum ef varlega er farið. Í mikilli úrkomu geta hinsvegar fólksbílar lent í vandræðum.

Mýrarkvísl – veiðihús:

Rúmgott, notarlegt, og nýuppgert veiðihús fylgir seldum veiðileyfum, en í því eru 4 tveggja manna svefnherbergi, auk eldhúss með öllum helstu áhöldum og gasgrill. Veiðihúsið er ekki langt frá efsta veiðistað Mýrarkvíslar.

Gefðu svæðinu þína umsögn

Netfang þitt verður ekki birt. Nauðsynlegir reitir eru merktir *

*